Barnadansistevnan 2022

Leygardagin er barnadansistevnan á skránni. Fyriskiparnir siga soleiðis um tiltakið:

Stevnan verður hildin í skúlanum / ítróttarhøllini á Eiði leygardagin 30. apríl.

Stevnan verður sett kl. 10:00 og endar kl. 15:00. yvirskipað skrá kann síggjast her

Til stevnuna koma børn og vaksin úr nærum øllum landinum. Tíverri eru eingin úr Suðroynni við hesuferð.

Luttakaratalið verður uml. 300.

Dansifelagið á Látrinum skipar fyri stevnuni í samstarvi við Sláið Ring.

Í vár varð aftur skipað fyri barnadansi á Látrinum og undirtøkan var sera góð. Hetta sæst eisini aftur í tilmeldingini frá barnadansinum, 26 børn og 21 vaksin.

Børnini hava kvøðið og lært seg fleiri sangir og kvæði. Á stevnuni koma tey at kvøða hesi og okkurt forkunnugt eisini. Børnini á Látrinum fara at skipa Øskudólgur og Sópingarkona, Nykursvísu og møguliga okkurt afturat.

Umframt kvøðing og dans, verður eisini skipað fyri útferð á Niðaru Fitjar. Ein slík útferð er altíð áhugaverd fyri luttakararnar, serliga avbygdafólk. Vit síggja oman í Hólman, har nykurin býr, niðri á Vatni við ríkum fuglalívi og nógvum øðrum.

Á Niðar Fitjum verður steðga á og hugt eftir Risanum og Kellingini. Á veg heimaftur eftir Svannisbrekku sæst, at Kellingin fer undan Risanum. Hon skundar sær, so Risin skal fáa ein heitan munn, tá hann kemur aftur úr torvi – soleiðis søgdu tey fyrr, tá børnini spurdu.

Frá kl. 12:00 til 13:30 fá luttakarnir døgurða.

Frá kl. 13:45 til 14:30 dansa øll saman. Vónandi liggur fyri hjá fleiri vaksnum, at verða við.

Vónandi síggja vit fleiri tykkara meðan stevnan er.